राप्रपाको नगर अधिवेशन सम्पन्न, महेश खरेल बने अध्यक्ष

सिमरा ।

राष्ट्रिय प्रजातन्त्र पार्टी जीतपुरसिमरा नगर कमिटीको दोस्रो नगर अधिवेशन शनिबार सिमरामा सम्पन्न भएको छ । अधिवेशनले महेश (दुर्गाप्रसाद) खरेलको अध्यक्षतामा ५१ सदस्यीय नगर कमिटी चयन गरेको छ ।

कमिटीको उपाध्यक्षमा होमबहादुर रखाल, सुरज लम्साल, अनिता सिंह, सचिवमा केदारभक्त पौडेल, कोषाध्यक्षमा भेषबहादुर श्रेष्ठ चयन भएका छन् । कमिटीको पदाधिकारीमा दुई सहसचिव पछि चयन गरिनेछ ।

सोही अवसरमा राप्रपाले नारायणप्रसाद घिमिरेको अध्यक्षतामा राष्ट्रिय प्रजातान्त्रिक युवा संगठन गठन गरेको छ । कमिटीको उपाध्यक्षमा साजन राई, अर्जुन लामा, महिला उपाध्यक्षमा बसन्ती विक, सचिवमा कुमार तिमिल्सिना र कोषाध्यक्षमा सुशिलकुमार सिंह रहेका छन् ।

कार्यक्रममा दर्जनौं नेता कार्यकर्ता पार्टी प्रवेश समेत गरेको छन् । रास्वपा, एमाले र काङ्ग्रेस लगायत मधेसी दलहरु परित्याग गरि राप्रपा प्रवेश गरेकालाई अध्यक्ष लिङ्देनले टीका र माया लगाएर स्वागत गरेका थिए ।

नगर कमिटी, वडा कमिटी र युवा कमिटीमा निर्वाचित पदाधिकारी एवम् सदस्यलाई राप्रपा नेपालका केन्द्रीय अध्यक्ष राजेन्द्र लिङ्देन, संगठन विभागकी उपप्रमुख खुस्वु ओली, राप्रपाका नेता दीपक सिंह, केन्द्रीय सदस्य विनोद भारतीलगायतले प्रमाणपत्र प्रदान गरेका थिए । अधिवेशन नगर कमिटी अध्यक्ष माधवप्रसाद त्रिपाठीको अध्यक्षतामा सम्पन्न भएको थियो ।