आलोचनासँगै सिमरामा ६८ औं राष्ट्रिय सहकारी दिवसको कार्यक्रम सम्पन्न

भोजराज भट्टराई, बारा । जीतपुरसिमरा उपमहानगरपालिकाको आयोजनामा ६८ औं राष्ट्रिय सहकारी दिवस विशेष कार्यक्रम बुधबार सिमरामा सम्पन्न भएको छ ।
सहकारी अभियानले हरेक बर्ष चैत्र २० गतेका दिन राष्ट्रिय सहकारी दिवस मनाउँदै आएको छ । नेपालमा २०१३ साल चैत २० गते चितवनमा बखानपुर ऋण सहकारी संस्थाको स्थापना भएको थियो ।

यसै दिनलाई सहकारी आन्दोलनको शुरुवात भएको दिनका रूपमा स्मरण गर्दै हरेक वर्ष चैत २० गते राष्ट्रिय सहकारी दिवस मनाउने गरिएको हो । देशभर अहिले झन्डै ३१ हजार सहकारी संस्था रहेको तथ्याङ्क छ ।

यसबर्ष “मर्यादित सहकारी : समुन्नत समाज” भन्ने सहकारी नाराका साथ जीतपुरसिमरा उपमहानगरपालिकाको अगुवाईमा पालिका भरी संचालनमा रहेका सहकारीकर्मीहरुको भब्य उपस्थीतिमा कार्यक्रम सम्पन्न भएको हो ।

सिमरा बजारमा प्रभातफेरीसँगै २ नं. वडा कार्यालयका अगाडीको खुल्ला स्थानमा आयोजित सभालाई सहकारी अगुवा, पत्रकार, कर्मचारीका साथै नगरप्रमुख राजन पौडेलले सम्बोधन गरेका थिए ।

नगरभरीका करिब एकसय सहकारी संस्थाहरु मध्य उत्कृष्ठ ३ वटा सहकारी र दुईजना सहकारीका ब्यवस्थापक सहकारी दिवसका अवसरमा पुरस्कृत भएका हुन् । पुरस्कृत हुने सहकारीहरुमा हातेमालो साकोस सिमरा, औराह पशुपालन कृषि र सिपमुलक कृषि सहकारी फत्तेपुर छन् ।

यस्तै हातेमालो साकोस सिमराकै ब्यवस्थापक महेश ढुङ्गेल र सिमरा महिला साकोसकी सरस्वती कुमारी थिङ्ग पुरस्कृत भए । उनीहरुलाई दिवस विशेष सभामा नगर प्रमुख राजन पौडेलले पुरस्कार प्रमाणपत्र प्रदान गरेका थिए ।

यद्यपी उत्कृष्टता छनौटको आधार र औचित्य प्रष्ट नपारिएको भन्दै उपस्थीत अन्य सहकारीकर्मीहरुले आयोजक पालिका प्रति प्रश्न उठाएका थिए । कार्यक्रमलाई हल्काफुल्का ढंगबाट लिएको , सहकारी अभियान र अभियानकर्मी नेतृत्वको सामान्य मर्यादा समेत नराखेको र संचारकर्मीहरुलाई ब्यवास्था गरिएको भन्दै वक्ताहरुले कार्यक्रमको आलोचना समेत गरेका थिए ।

कार्यक्रममा प्रदिपसिंह बराल,बेनी तिमल्सिना, यज्ञ बहादुर आले, झपेन्द्रराज बराल, पुष्पराज खतिवडा लगायत सहकारीकर्मीहरुले बोलेका थिए । वक्ताहरुलाई अतिथी आसन ग्रहण समेत नगराई मन्तब्य राख्न लगाएपछि खतिवडा र आलेले मंचमा नचढी बोलेका थिए ।

आलोचनापछी नगर प्रमुखले पालिकाका प्राय कार्यक्रम विवादित बन्ने गरेको प्रति चिन्ता ब्यक्त गरे । उनले मंचासिन प्रमुख प्रशासकिय अधिकृतलाई आगामी दिनमा यस्तो कमजोरी हुन नदिन आग्रह गरे ।

उनले भने “हुन त म जवाफ दिने ठाउँमै छु । यद्यपी हाम्रा कतिपय कार्यक्रमहरुमा प्रश्न उठिरहेका हुन्छन् । हाकिमसाव यहीँ हुनुहुन्छ उहाँ मार्फत कर्मचारीहरुलाई कार्यक्रमहरु गर्दा गम्भीर एवं जिम्मेवार बनिदिन अग्रह गर्दछु । ”

मेयर पौडेलले सहकारीहरुले एक्लै वा सामुहिक रुपमा गर्ने उत्पादन, भण्डारण र ब्राण्डीङ्गका काममा पालिका सहकार्य गर्न तयार रहेको बताए ।

कार्यक्रममा कृषि, सहकारी, भूमी व्यवस्थापन र गरिबी निवारण समितिका संयोजक एवं वडा नं.१८ का वडाध्यक्ष चतुरबाबु वाग्ले,सोही समितिका सदस्य एवं १५ नं. वडाका अध्यक्ष रामप्रसाद लामिछाने, १४ की अध्यक्ष एवं सामाजिक विकास समिति संयोजक चयन गुरुङ्ग , आर्थिक विकास समिति संयोजक एवं वडा नं.२१ का अध्यक्ष सुवास श्रेष्ठ मंच आसिन थिए ।

यस्तै पालिकाका कार्यकारी अधिकृत सहसचिव शान्तिराज प्रसाईं , पालिकाको सहकारी समन्वय समितिका सदस्य मुकुन्द बहादुर क्षेत्री लगायत सहभागि थिए । नगर उपप्रमुख भोला प्रसाद अधिकारीको अध्यक्षता एवं सहकारी शाखा प्रमुख अधिकृत दुर्गा न्यौपानेको सहजीकरणमा कार्यक्रम सम्पन्न भएको हो ।