सिमरामा नेपाल जेसीजको लोम तालिम : देशभरका प्रतिनिधी आउँदै

सिमरा ।

 नेपाल जेसिजको तीनदिने लोम तालिम सिमरामा आयोजना हुँदैछ । सिमरा जेसिजको आतिथ्यता तथा नेपाल जेसिजको आयोजनामा हुने ‘लोम लिडरसिप एकेडेमी २०२५’ मा सहभागि हुन देशभरका जेसिज शाखाका प्रतिनिधी सिमरा आउनेछन् ।

प्रत्येक शाखाबाट अध्यक्ष, महासचिव, कोषाध्यक्ष र कानुनी सल्लाहकार गरी अनिवार्य रुपमा चारजनाको सहभागिताका लागि नेपाल जेसीजले आग्रह गरेको छ । सिमराको होटल ईच्छामा आयोजना हुन लागेको कार्यक्रममा देशभरका १ सय ८१ जेसिज शाखाका प्रतिनिधी र केन्द्रिय पदाधिकारी गरी करिब ८ सय जनाको सहभागिता रहनेछ ।

सिमरा जेसिजले मंगलबार सिमरामा पत्रकार सम्मेलन गरेर कार्यक्रमको तयारीबारे जानकारी गराएको हो । पहिलोपटक सिमरा जेसिजले ठुलो कार्यक्रमको आयोजनामा सहकार्य गर्ने अवसर पाएको भन्दै सिमरा जेसिजका पुर्व अध्यक्ष शालिकराम अधिकारीले कार्यक्रम सफल पार्न सिमराबासी सबैको साथको जरुरी रहेको बताए । ‘सिमराको पहिचान र यहाँको अर्थतन्त्रसंग जोडिएको जेसिजको राष्ट्रिय कार्यक्रमको अपनत्व ग्रहण गर्न म सम्पूर्ण सिमराबासीलाई आग्रह गर्छु’ अधिकारीले भने ।

फागुन ९ गतेबाट शुरु हुने कार्यक्रम फागुन ११ गते समापन हुने नेपाल जेसिजले जनाएको छ ।