सिमरा कलेजमा पूर्व विद्यार्थी भेला, शैक्षिक विकास कोषको स्थापना

सिमरा ।

बाराको सिमरास्थित सिमरा कलेजले पहिलोपटक बृहत पूर्व विद्यार्थी भेलाको आयोजना गरेको छ ।

सिमरा कलेजको आयोजना तथा पूर्व विद्यार्थी परिषदको सहजीकरणमा भएको कार्यक्रममा करिब डेढ सय पूर्व विद्यार्थी सहभागि भएको सिमरा कलेजका प्रमुख शालिकराम अधिकारीले जानकारी दिनुभयो ।

सिमरा कलेजमा अध्यापन गराएका पूर्व प्राध्यापकहरु रामप्रसाद अधिकारी, अच्युतदेब सिटौला र इद्रिस मियाँलाई पूर्व विद्यार्थीहरुले सम्मान गरेका थिए । सो अवसरमा कलेजका पूर्व सहायक क्याम्पस प्रमुख तथा जीतपुरसिमरा उपमहानगरपालिकाका प्रथम नगर प्रमुख स्व. डा.कृष्ण पौडेललाई मरणोपरान्त सम्मान गरिएको थियो । स्व. पौडेलका छोरा सुफल पौडेलले सम्मान पत्र ग्रहण गरेका थिए ।

कार्यक्रममा पुर्व विद्यार्थीहरुले आफ्नो कलेज जीवनको अनुभव शेयर गरेका थिए । कार्यक्रममा कलेजका पूर्व विद्यार्थी समेत रहेका गजलकार अविनाश सापकोटाले साहित्य वाचन समेत गरेका थिए ।

सिमरा कलेज व्यवस्थापन समितिका कार्यवाहक अध्यक्ष मधुकर अधिकारीको अध्यक्षता तथा जीतपुरसिमरा उपमहानगरपालिकाका नगर प्रमुख राजन पौडेलको प्रमुख आतिथ्यतामा सम्पन्न कार्यक्रममा जीतपुरसिमरा उपमहानगरपालिकाका नगर उपप्रमुख भोला प्रसाद अधिकारी, जीतपुरसिमरा उपमहानगरपालिका २ का वडाध्यक्ष धनबहादुर श्रेष्ठ, क्याम्पस सञ्चालक समितिका किशोर त्रिपाठी, इश्वर ढुंगेल, कृष्ण पुडासैनी, पूर्व विद्यार्थी परिषद तदर्थ समितिका संयोजक नृपराज बराल लगायतको उपस्थिती रहेको थियो ।